A representación da CIG en Urbanos de Ourense, concesionaria do servizo municipal de transporte, presentou hoxe unha denuncia na Inspección de Traballo ante o continuo estrés laboral que padece o persoal de condución como consecuencia duns tempos de traxecto “imposíbeis de cumprir”.
Con esta acción a sección sindical vén de poñer en marcha unha campaña de información e de socialización das problemáticas que afectan as persoas traballadoras, iniciativa que se desenvolverá ao longo dos vindeiros meses.
Dende a central denuncian que o estrés laboral que afecta a saúde do persoal de Urbanos de Ourense é consecuencia directa dun sistema de liñas deseñado a final dos anos 80, cuns tempos por percorrido que resultan de imposíbel cumprimento na actualidade.
“Ao longo destes anos a cidade mudou considerabelmente, e o servizo veuse afectado por cuestións como a redución de velocidades, a perda de carrís por mor da accesibilidade ou un aumento das persoas usuarias que fai máis lenta a condución”.
Acusacións do alcalde
Ao mesmo tempo, amosan a súa “enérxica condena” ás afirmacións do alcalde no último pleno, acusando o persoal de condución de Urbanos de Ourense dunha folga encuberta, “o que é totalmente falso”. Como tamén rexeitan as declaracións da voceira municipal do PP nas que responsabilizaba o persoal dos atrasos e do mal funcionamento do servizo.
“Estas intervencións parécennos unha falta de respecto e unha tomadura de pelo, xa que levamos solicitado por activa e por pasiva unha reordenación horaria dos servizos; os tempos dos traxectos están totalmente desfasados, e se hai días que non finalizamos algún é exclusivamente por orde da empresa, algo que o alcalde coñece pois xa llo trasladamos en varias ocasións”.
