Unha persoa faleceu esta madrugada en Maside tras sufrir unha saída de vía co seu vehículo na AG-53, á altura do quilómetro 78. O accidente produciuse ás 00:45 horas, e foi un particular o que contactou co 112 Galicia ao atopar un coche entre os arbustos dunha estrada paralela, indicando que todo apuntaba a unha saída brusca do vehículo.
Ante a gravidade do suceso, activouse un operativo de emerxencias no que participaron o Servizo de Urxencias Sanitarias de Galicia-061, os Bombeiros do Carballiño, axentes da Garda Civil e efectivos de Protección Civil. Ao chegar ao lugar, os profesionais sanitarios unicamente puideron certificar o falecemento da vítima, un home de 58 anos.
