As edís do grupo municipal socialista do Concello de Ourense percorreron Reza xunto á veciñanza para recoller as demandas e necesidades desta zona rural da cidade. Entre ditas necesidades destaca a reforma da rúa do Portalón, que constitúe a arteria principal do barrio e que precisa un acondicionamento integral por presentar, entre outras deficiencias, múltiples e fondas fochancas.
«Este barrio ten unha identidade e historia propias que dende o Concello de Ourense debemos loitar por conservar para ofrecer aos que alí viven a mesma calidade nos servizos públicos e infraestruturas das que desfruta o centro da cidade. Algunhas beirarrúas e camiños precisan de labores de desbroce urxentes», enfatiza a voceira do PSdeG na Administración local, Natalia González.
Neste senso, as socialistas tamén reclaman que os espazos verdes e recreativos de Reza sexan acondicionados, ao atoparse descoidados e con abundante maleza, para que a cativada dispoña de lugares de lecer. «Dende o PSdeG levamos anos reivindicando tamén que o parque 25N sexa aproveitado para dinamizar esta contorna con actividades e programación que debería complementarse con melloras para as persoas maiores, a área de autocaravanas, que conta con cada vez máis usuarios e usuarias e o adecentamento do parque canino», engade sobre algunhas das posibilidades do terreo situado ao carón das instalacións da asociación de veciños e veciñas.
Así as cousas, tanto a sinalización como as marquesiñas requiren ser renovadas. «A veciñanza das áreas rurais da cidade paga os mesmos impostos que o resto e debería obter a cambio, polo menos, as mesmas prestacións. Polo tanto, non podemos máis que reclamar que o goberno de Gonzalo Pérez Jácome leve a cabo intervencións que contribúan a incrementar a atracción de nova veciñanza e á retención da que xa vive nestas áreas máis desatendidas, especialmente dende que DO chegou ao executivo», remata a tamén secretaria xeral do PSdeG en Ourense.
