A Subdelegación do Goberno en Ourense acolleu hoxe a presentación dos novos mapas cartográficos oficiais da provincia de Ourense e de Galicia, editados polo Instituto Xeográfico Nacional. No acto participaron o subdelegado do Goberno, Eladio Santos, e representantes do Instituto, entre eles Pablo Carballo, responsable en Galicia.
Estas novas versións, as primeiras en papel en 10 anos, incorporan actualizacións en infraestruturas, poboación e toponimia. Segundo explicou Carballo, o cambio metodolóxico permitiu xerar bases de datos máis detalladas, o que facilitará futuras edicións en menos tempo, cunha nova publicación esperada en catro anos. Os mapas tamén están dispoñibles en formato dixital a través da web do Instituto, con actualizacións constantes grazas ao uso de intelixencia artificial.
Carballo destacou que o Instituto Xeográfico non só atende ás empresas de enxeñaría ou estudos ambientais, senón tamén a outras administracións e ao público en xeral, facilitando o acceso gratuíto á información cartográfica. Ademais, o Instituto ofrece recursos educativos e controla a rede sísmica nacional, proporcionando datos en tempo real sobre a actividade sísmica en España.
O subdelegado Eladio Santos salientou o valor do Instituto como referente para outras administracións.
