Medio cento de veciñas e veciños de Ourense participaron na asamblea aberta «Polo dereito á vivenda» convocada polo colectivo «Espazo Veciñal Ourense» no Café Cultural Auriense este domingo 9 de marzo. Coincidiron na preocupación pola situación da vivenda na capital ourensá e tamén no resto da provincia. Examinaron distintos problemas que afectan á veciñanza, co obxectivo de impulsar unha serie de medidas que protexan os dereitos das persoas e familias afectadas polos elevados prezos do alugueiro, a especulación inmobiliaria e outras cuestións relacionadas.
Durante a asamblea houbo unanimidade na defensa de reivindicacións que consideran fundamentais para mellorar a situación da vivenda na nosa contorna. Entre as demandas máis destacadas e urxentes resaltan:
– A declaración de zonas tensionadas.
– A desarticulación dos grupos de desokupación
– A baixada dos prezos do alugueiro.
– A prohibición da vivenda turística.
– A prohibición da venda de vivenda para especular.
A asemblea finalizou cun claro consenso para secundar en Ourense as mobilizacións estatais convocadas para o próximo 5 de abril, coa finalidade de visibilizar estas demandas e loitar por unha vivenda digna e accesible para todas as persoas. A veciñanza deixou claro que está disposta a seguir loitando até que se consigan os cambios necesarios para mellorar as condicións de vida na cidade.
O vindeiro domingo 16 de marzo ás 18:30 celebrarase unha nova asemblea aberta na zona do Rianxo da Praza de Abastos das Burgas.
