Hoxe venres, Teresa Barge Bello (Caracas, 1960) revalidou a presidencia da agrupación local do Partido Popular na Bola no congreso celebrado esta tarde no multiusos de Cacabelos. Unha convocatoria que contou coa presenza da secretaria xeral do PPdeG, Paula Prado, e do presidente dos populares ourensáns, Luis Menor. Ambos apelaron á presidenta a seguir fomentando a proximidade á veciñanza, como única fórmula para coñecer de primeira man as necesidades das súas xentes, pero tamén para «fortalecer a confianza no partido» e atraer a novos afiliados que sintan a pertenza ao PP, «compartindo a responsabilidade de representar ao partido maioritario do seu concello e da súa provincia.
Paula Prado asegurou que para ela sempre é unha honra estar a carón das mulleres, e máis se se trata de mulleres como Teresa Barge, unha das 29 alcaldesas do PP en Galicia. Unha cifra que, segundo salientou, converten á formación na que máis rexedoras ten na Comunidade e, ademais, case a metade, un total de 13, son desta provincia de Ourense.
Así mesmo, a número dous dos populares galegos salientou que Teresa representa o mellor do PP e sinalou que é unha referente: como muller valente, que protexe aos seus veciños; e como exemplo para todas as mozas que están empezando a política.
Por outra banda, lamentou que a Galicia que goberna, liderada por Alfonso Rueda, teña enfronte unha oposición que bloquea, liderada principalmente polo partido do ‘non’ a todo, o Bloque Negacionista Galego, unha cuestión que avogou por seguir desenmascarando, tamén en concellos como A Bola.
LUIS MENOR: «CONSOLIDACIÓN DO PARTIDO NO TERRITORIO»
No seu discurso, Luis Menor encomiou o compromiso político da tamén alcaldesa e deputada provincial, que con este congreso revalida a presidencia local do PP, na que estaba á fronte desde principios de 2019.
O proceso congresual iniciado hai un mes coa constitución de novas xuntas locais «é un labor de consolidación do partido no territorio», afirmou Menor, demostrando que o traballo político no PP «é constante e non só en período electoral».
O presidente dos populares ourensáns aplaudiu tamén a aposta de Barge pola mocidade «porque a política non entende de idades, pero si sabemos do pulo que imprimen a enerxía e gañas dos máis mozos».
TERESA BARGE TRABALLARÁ PARA ATRAER A MÁIS MOCIDADE E XENTE COMPROMETIDA
Precisamente a mocidade está entre as principais liñas de traballo expostas pola presidenta local trala súa proclamación, afirmando que quere «progresar na afiliación de xente moza, que xa leva un camiño positivo», ao tempo que comprometeuse a facer do PP da Bola «un partido aínda máis aberto á veciñanza e con máis xente comprometida, para ser máis sólidos e fortes».
Teresa Barge puxo en valor a contribución dos gobernos populares da Deputación de Ourense e da Xunta de Galicia ao desenvolvemento do municipio, que xunto ao traballo do equipo municipal que preside e dos afiliados e simpatizantes «tradúcese nun 70% de apoio electoral no concello e, polo tanto, dunha enorme confianza».
VINTE E DOUS ANOS COMO ALCALDESA
Teresa Barge, funcionaria en excedencia, chegou á alcaldía da Bola en 2003, aínda que foi no 2015 cando encabezou por primeira vez a lista do Partido Popular neste concello, obtendo desde entón continuas maiorías absolutas.
