«O 60% dos edificios do centro histórico atópanse en estado ruinoso e, se non se actúa de xeito urxente, pódense perder para sempre, tal e como levamos anos denunciando. A decadencia é evidente e basta con dan un paseo pola zona para comprobalo», comeza expoñendo a portavoz do grupo municipal socialista no Concello de Ourense, Natalia González Benéitez.
Que a Concellería de Urbanismo se atope somerxida no caos -como amosa a tardanza á hora de tramitar licenzas, e o desmantelamento hai 3 anos da oficina do PERI- dificulta máis, segundo as e os socialistas, que se traballe axilmente nesta ferramenta que xa foi anunciada no Diario Oficial de Galicia.
«Dende que Gonzalo Perez Jácome goberna esta cidade hai seis anos, as políticas de vivenda e o fomento do comercio local son inexistentes e constitúen, non obstante, dous eixos transversais que deben desenvolverse parellamente para dinamizar o casco histórico facéndoo atractivo para revitalizar os edificios que o conforman. Só un 10% dos baixos teñen actividade económica», engade sobre a ausencia de vontate do executivo de DO.
Neste senso, lamentan que, do mesmo modo que aconteceu con outras subvencións millonarias que se perderon por non cumprir cos prazos de solicitude, a Área Rexurbe esmoreza por falta de planificación e traballo. «Ourense non se atopa en condicións de seguir perdendo oportunidades», incide.
As e os socialistas consideran tamén, identificadas as necesidades e deficiencias do casco histórico, unha oportunidade perdida a delimitación da Área Rexurbe porque o 40% do casco vello queda excluído da mesma. «Trátase dun ‘bypass’ pouco ambicioso por parte da Xunta de Galicia, o que non quere dicir que poida converterse nunha boa nova se a Administración local se pon a traballar arreo para aproveitalo», rematou a voceira do PSdeG.
