«A transparencia debería ser un dos valores transversais dunha administración pública, como piar fundamental que asegura que non se produza ningunha actividade relacionada coa corrupción», indicou a edil do PSdeG no Concello de Ourense María Fernández na súa exposición da moción que presentou o grupo municipal durante o pleno ordinario de xullo.
As e os socialistas conseguiron o respaldo de todos os grupos da oposición para aprobar unha iniciativa que insta ao goberno local a que manteña a información actualizada e a que implemente as canles de participación da cidadanía nas políticas públicas. Tanto o PP como o BNG votaron a favor dun texto que reclama ao executivo de Jácome o cumprimento das súas obrigas legais de subministro de información ao Ministerio de Facenda e ao Tribunal de Contas de Galicia, nos prazos estipulados.
Neste senso, a socialista recriminou ao alcalde, Gonzalo Pérez Jácome, e ao seu equipo que actualmente «o Concello de Ourense non soamente non conta con publicacións actualizadas no apartado de transparencia, senón que incumpre sistematicamente o subministro de información obrigatoria ás administracións competentes». E lembrou que a esta situación se engade o bloqueo ao traballo dos membros da corporación que ven diariamente lesionados o seus dereitos como edís. «As políticas de transparencia non se cumpren nas Xuntas de Area nin na web do Concello nin se está a facilitar a información aos membros da corporación, polo menos non aos do meu grupo político.» engadíu a concelleira.
Por outra banda, o grupo municipal socialista tamén conseguiu que se aprobase (coa abstención de Democracia Ourensana) a súa moción para impulsar un Acordo Municipal contra os Discursos de Odio para eliminar todos os obstáculos que seguen impedindo que as persoas do colectivo LGBTIQ+ poidan desenvolver os seus proxectos vitais en condicións de igualdade.
A edil do PSdeG Cristina Cruz aclarou que «o aumento de discursos de odio dirixidos cara o colectivo representa unha seria ameaza para os dereitos humanos e a convivencia pacífica na nosa sociedade». «Estas mensaxes non só xeran división e promoven a discriminación, senón que tamén poden derivar en actos de violencia física, verbal e emocional», engadiu.
As entidades locais son actores fundamentais na loita contra estes discursos, sendo a educación un dos principais ámbitos dende os que se pode actuar a fin de transmitir o respecto á diversidade. Por elo, inclúese nos puntos de acordo do texto instar ao executivo a impulsar e colaborar co tecido asociativo a cidade e as redes de apoio para as vítimas dos discursos de odio, así como a apoiar festivais de cine, eventos deportivos e outros acontecementos que fomenten a inclusión e a incorporar material especializado nas bibliotecas municipais.
«Quero lembrar o servizo 028 ‘Arco da vella’, que é un servizo gratuíto e confidencial que axuda ás vítimas, que informa dos seus dereitos e ofrecen atención psicosocial» rematou.
