A Deputación de Ourense, a través do Inorde, impulsa o Programa de apoio ao emprendemento e consolidación empresarial vinculado ao destino rural Ourense Termal. Este programa está aprobado no marco do Plan de Sostibilidade Turística (PST) en Ourense Termal, a través do que se financia esta acción, recollida no convenio subscrito pola Deputación, a Xunta de Galicia e a Secretaría de Estado de Turismo, tal e como explicou o presidente do Inorde, Rosendo Fernández, na presentación deste programa que tivo lugar esta mañá na Deputación e na que tamén participou a xerente do Plan de Sostibilidade Turística en Ourense Termal, Emma González; así como Andrés Mazaira, coordinador da empresa adxudicataria que está a desenvolver este programa.
Así, trátase dun programa de formación, apoio, consultaría e asesoramento para o impulso a proxectos relacionados, directa ou indirectamente, co entorno termal. Poden participar emprendedores e empresas que estean a valorar desenvolver proxectos en polo menos un dos 15 municipios do termais rurais de Ourense e que pertenzan a sectores como o termalismo, turismo, loxística, mobilidade, beleza, tecnoloxía aplicada aos sectores turístico e termal.
Tal e como explicou Rosendo Fernández, os obxectivos desta acción baséanse en articular un programa, tanto para emprendemento como para empresas existentes; servir de impulso para xerar un impacto económico positivo, xa sexa en termos de destinatarios, de promotores ou de impacto no medio; que teña como finalidade xerar desenvolvemento sostible; e que xere emprego de calidade nos municipios do destino rural Ourense Termal: Arnoia, Bande, Boborás, Baños de Molgas, Cortegada, Cenlle, Castrelo de Miño, O Carballiño, Leiro, Lobios, Monterrei, Muíños, Punxín, Ribadavia e Verín. De feito, os participantes non teñen que estar ubicados nestes municipios, pero sí prestar servizos nalgún deles.
De feito, Emma González matizou que, dentro da filosofía do PST en Ourense Termal, realizouse unha actividade previa de detección de necesidades para culminar este programa, baseado en axudar a convertir ideas primarias en modelos de negocio.
Aberto o prazo de solicitudes
Os interesados en participar neste programa totalmente gratuíto, poden presentar a súa solicitude na páxina web www.emprendemento.outermal.com ata o 6 de marzo. Unha vez cumprido ese prazo, elixiranse 30 proxectos que farán a formación e serán candidatos a realizar a mentorización ata o mes de xuño. Tal e como matizou Andrés Mazaira, o obxectivo final será acadar 13 proxectos que aporten valor ao territorio, 8 deles na categoría de emprendemento e 5 na de desenvolvemento, e que todos eles estean acompañados en todo momento para conseguir os seus obxectivos. De feito, estes proxectos contarán cun titor personalizado de referencia, dentro dun modelo feito a medida para que os emprendedores acaden os seus obxectivos e doten de prosperidade e novas liñas de negocio aos 15 municipios do destino rural Ourense Termal.
