O deputado provincial do BNG de Ourense, Xosé Manuel Puga, rexistrou unha enmenda aos orzamentos do INORDE, que serán debatidos na sesión do mércores 13 de novembro. A proposta dos nacionalistas busca desviar 608.220 euros da actual proposta orzamentaria deste organismo provincial, dependente da Deputación de Ourense, co fin de financiar investimentos e colaboracións con entidades públicas e privadas que fagan actividades de dinamización económica e social na provincia.
Puga explicou que esta medida ten como obxectivo mellorar a incidencia do INORDE no desenvolvemento económico e social da provincia, tal e como se establece nos estatutos do propio organismo. A enmenda contempla a redistribución dos fondos, detraendo importes dos catro capítulos do orzamento do INORDE para crear unha nova partida destinada á dinamización.
O grupo nacionalista tamén manifestou a súa sorpresa pola falta da documentación completa sobre o estado de execución do orzamento, fundamental para avaliar o cumprimento das previsións do ano pasado.
