Comunicado do BNG:
O BNG EXPRESA O SEU APOIO ÁS FAMILIAS DE PROCAD E O SEU REXEITAMENTO AOS FEITOS COÑECIDOS RESPECTO DUN EX PORTAVOZ DE PROCAPD
Desde o Bloque Nacionalista Galego, coñecido a través dos medios de comunicación o historial delitivo do ex portavoz de PROCAPD Rosendo Fernández, queremos manifestar as seguintes cuestións:
1. O seu apoio e solidariedade ás familias e membros da Plataforma Procapd nestes duros momentos, compartimos a súa sorpresa, conmoción e dor. Así mesmo, reiteramos o seu apoio á demanda dun centro público e de xestión directa, demanda xusta que non pode deslexitimar o feito de que unha persoa así enganara a todo o mundo nin o uso que se pretenda facer desta noticia.
2. Expresar a nosa máxima condena e rexeitamento sobre os delitos cometidos. Esta terrible situación debe facernos reflexionar sobre a necesidade de que as administracións públicas melloren os seus protocolos e medidas de prevención para impedir que calquera persoa que cometeu un delito destas características poida dedicarse con normalidade ao ensino ou a atención á discapacidade, pois isto demostra que se está fallando.
3. Reiterar que aínda que esta persoa formou parte puntualmente dunha candidatura local de Coles como suplente, nunca formou parte da afiliación nin do listado de persoas simpatizantes e non tivo nin ten ningunha vinculación política co BNG. Da mesma maneira que os pais e as nais da Plataforma, nunca puidemos imaxinar que un veciño que traballaba para os servizos públicos da Xunta puidese ter este pasado.
4. Lamentar o carroñerismo e a absoluta falta de escrúpulos do Partido Popular, que pretende aproveitarse duns feitos terribles que deberan ter a condena e a solidariedade unánime de todas as siglas para deslexitimar as demandas das familias e atacar o BNG. A súa falta de decencia e o seu intento de enlamar non lles vai servir para tapar o lesivo proceso de privatización dun servizo esencial que están a intentar levar a cabo.
