Mañá xoves, 21 de novembro, Barbadás converterase no epicentro da sensibilización contra a violencia de xénero ao ser elixido como escenario para a presentación da campaña do 25N da Federación Galega de Municipios e Provincias (FEGAMP). O acto, que terá lugar na Casa da Mocidade de Barbadás ás 11:30 horas, contará coa colaboración activa do Concello de Barbadás. A campaña busca concienciar á cidadanía sobre a urxente necesidade de erradicar a violencia contra as mulleres.
No acto, a vicepresidenta executiva da FEGAMP, María Barral, e o alcalde de Barbadás, Xosé Carlos Valcárcel, intervirán para detallar os obxectivos desta iniciativa. A elección de Barbadás non é casual, dado o seu compromiso coas políticas de igualdade e conciliación, destacando con programas pioneiros como o de «mudas» nos colexios, que favorece a conciliación familiar e promove a igualdade desde as primeiras etapas educativas.
O Centro de Información á Muller (CIM) de Barbadás tamén xoga un papel fundamental no apoio ás mulleres. Durante 2023, o CIM atendeu a 133 mulleres, realizando un total de 742 atencións. Estes recursos, que proviñan de fondos municipais e subvencións autonómicas, reflicten a importancia do traballo realizado na loita contra a violencia de xénero, non só en Barbadás, senón tamén en outros municipios da contorna.
