Comunicado de Espazo Común de O Carballiño:
Dende hai xa tempo, vimos asistindo, non sen certa incomidade, á polémica creada pola situación dos traballadores do Grupo Municipal de Emerxencias do Concello do Carballiño.
É aceptable e ata lóxico que haxa diferencias entre o goberno e algún grupo ou área de empregados públicos pero no caso que nos ocupa o asunto está totalmente fóra de control. Xa trascendeu o cruce de acusacións á opinión pública e a preocupación da cidadanía vai en aumento.
Resultou moi pouco edificante ver como o alcalde lles negaba a posibilidade de falar ao final da sesión plenaria do pasado 7 de marzo para explicar as súas demandas.
É a primeira vez en moitos anos que un rexedor nega a palabra a un cidadán en pleno.
O axeitado sería escoitalos e respostar, na medida do posible, aos seus prantexamentos.
No caso destes traballadores do Concello, é urxente resolver algunhas das súas demandas e decidir axiña cal é a liña a seguir para o futuro deste servizo.
Ao noso entender, a primeira eiva e a máis grave é a demanda dos EPIs (Equipos de Protección Individual).
Non é de recibo que o alcalde diga publicamente que non teñen que ir aos incendios, que non lles vai facilitar o equipamento necesario e despois que sexan constantemente mobilizados polo 112 para acudir a accidentes, incendios urbáns, incendios forestais e todo tipo de incidencias.
Ninguén desexamos ter que lamentar algún contratempo no caso dunha emerxencia grave. Sen ánimo de ser alarmistas, é obvio que podemos estar falando da vida de persoas.
No referente ao resto de demandas, o máis apropiado é a convocatoria dunha Mesa de Negociación Sindical longamente comprometida incluso en Xunta de Voceiros e en público e que é o vehículo axeitado para a resolución deste tipo de conflitos.
Visto todo o anteriormente comentado,
SOLICITAMOS
Que o Concello do Carballiño adquira os EPIs necesarios para a seguridade dos traballadores nas intervencións que teñan que acometer.
Que sexa convocada con urxencia a Mesa de Negociación Sindical incluindo na orde do día as demandas dos traballadores do Grupo Municipal de Emerxencias.
Asinado :
Manuel Vázquez Fernández
Adolfo Nogueira Campo
Érika Paz Rodríguez
Francisco José Fraga Civeira
Inmaculada Rodríguez Rodríguez
