O voceiro do grupo provincial do BNG na Deputación de Ourense, Bernardo Varela, expresou unha firme denuncia contra a utilización da forma deturpada «Orense» nun cartel publicitario patrocinado pola Deputación de Ourense e a Xunta de Galicia. O cartel en cuestión, que promove un evento de Jiménez Losantos, inclúe os logotipos de ambas institucións, provincial y e autonómica.
O BNG considera especialmente grave que esta situación se produza só quince días despois de que a Deputación aprobara por unanimidade un acordo para fomentar e dignificar a lingua galega. “É inaceptable a cesión de espazos dependentes de administracións públicas que teñen a encomenda legal, política e social de velar polo noso idioma a quen fai bandeira do desprezo e rexeitamento do idioma propio de Galiza”, afirmou Varela.
Os nacionalistas esixen que a Deputación se desvincule deste acto e demandan a retirada do cartel. Ademais, instan á Deputación e á Xunta a demostrar un compromiso real coa promoción do galego, evitando calquera complicidade con iniciativas que o menosprecen.
