O Concello de Barbadás achégase á veciñanza nun exercicio de transparencia para compartir e explicar o que fai e en que inviste cada euro que ingresa nas arcas municipais, así como o custe de cada servizo. Cada domicilio de Barbadás recibirá estes días unha carta do alcalde, Xosé Carlos Valcárcel, acompañada dun folleto no que verá o destino final dos cartos que achega ao Concello a través de impostos directos e indirectos, taxas e prezos públicos, así como a diferenza entre esta contribución e o custe real de cada un dos servizos que presta a institución local.
A contribución media de cada veciño de Barbadás ás arcas municipais non supera o euro ao día (0,96 euros), pero aínda así, o municipio pode presumir de contar cunha das carteiras máis amplas de servizos públicos de toda a provincia. En total, o Concello investirá 4,9 millóns de euros en prestacións, desde as máis básicas, como a iluminación pública ou a recollida de Residuos Sólidos Urbanos (RSU) ata outras tan demandadas como a Axuda no fogar, a Escola Infantil Municipal ou a Escola de Música.
Cabe destacar o esforzo que realiza o Concello para dar resposta ás necesidades da poboación, xa que a recadación é inferior ao gasto: en 2024, Barbadás ingresou 3,9 millóns de euros a través de taxas e impostos municipais. De feito, o actual goberno local mantén desde a súa chegada, hai xa 10 anos, o compromiso de non incrementar os impostos, que seguen a estar ao mínimo do permitido pola lei. No escrito dirixido á veciñanza, Valcárcel explica o motivo da actualización da taxa do lixo, debido a unha directiva da Unión Europea que obriga a todos os concellos do país a equilibrar os servizos prestados. Aínda así, “en Barbadás implantamos unha fórmula máis xusta, social e sostible”, na que os que máis contaminan, pagan máis.
O grupo de goberno agarda que a poboación entenda esta campaña de transparencia como un xeito de agradecer a aportación de cada veciño e veciña ás arcas municipais, xa que sen as súas achegas, non sería posible contar coa ampla carteira de servizos públicos de Barbadás. “Non é ningunha milagre, é o esforzo da veciñanza”, resalta o alcalde.
Carta do Alcalde
Folleto
