O goberno municipal de Barbadás anunciou hoxe, a través da súa tenente de alcalde, Victoria Morenza, que unha das prioridades a abordar este ano é o inicio dos traballos de posta ao día do Plan Xeral de Ordenación Municipal de Barbadás, empezando pola adaptación á lei do solo de Galicia e continuando pola súa modificación.
O obxectivo, polo tanto, é dobre: por un lado, dar resposta as actuais necesidades do municipio en materia dos diferentes solo que precisa, así como de vivenda pública e privada, infraestruturas públicas e servizos; e por outro, e previamente, adaptar a actual normativa á lei do solo en vigor.
Compre lembrar que o actual PXOM data do ano 2002 e que está a piques de cumprir os 23. É coñecido por todos que no momento da súa redación e aprobación foron atendidos intereses que en moitas ocasións nada tiñan que ver co interese xeral, deixando pola contra desatendidas moitas necesidades que xa existían entón e que agora son inaprazables, como por exemplo un novo instituto, un centro de convencións e congresos ou mesmo a reserva de terreos para novas dotacións públicas e a previsión de vivendas protexidas en cantidade suficiente para atender a demanda que existe no concello.
O anuncio do inicio dos traballo para a adaptación, primeiro, e modificación do PXOM, a continuación, foi realizado durante o debate dunha moción presentada polo Partido Popular na que proponía a creación dun servizo de asesoramento técnico de vivenda en Barbadás, similar ao que existe, segundo puxo de manifesto a voceira popular Chelo Vispo, en concellos como Pereiro de Aguiar e San Cibrao das Viñas.
Morenza amosouse de acordo coa creación do servizo, se ben condicionou a súa posta en marcha á dispoñibilidade orzamentaria. En calquera caso, aproveitou para sinalar que a principal prioridade do goberno local en materia de urbanismo era outra: “á adaptación á legalidade vixente de PXOM e a súa moficación”.
Así, explicou que “dende o Concello facémonos eco da inquedanza que existe entre diversos colectivos cidadáns e representantes sociais que reclaman unha modificación do PXOM, de maneira que se adecúe á realidade dos tempos que agora vivimos. E así o fará o Concello de Barbadás; ese é o camiño que queremos seguir, unha vez máis, traballando coa e pola veciñanza na adaptación do plan urbanístico para beneficiar aos veciños e veciñas de Barbadás”.
O alcalde de Barbadás, Xosé Carlos Válcarcel, pola súa banda, precisou que a adaptación á lei do solo e a modificación do Plan Xeral de Ordenación Municipal é «unha necesidad urxente para correxir erros e abusos do pasado, nos casos nos que ainda sexa posible, pero sobre todo representa unha oportunidade para que entre todos e todas planifiquemos o Barbadás que queremos construir nun futuro, coa máxima participación de todos os axentes e situándonos todos nun plano de igualdade que repela calquera tipo de presión, proceda de quen proceda».
