A CIG-Industria celebrou hoxe en Ourense unha asemblea nacional de delegados/as na que se abordou a situación e as principais problemáticas de sectores como automoción, naval, eólico ou siderometal e de empresas como Alcoa, Navantia, Vestas ou Faurecia. Ao remate do encontro que tivo lugar no auditorio municipal no marco da campaña que a central está a desenvolver a nivel nacional baixo o lema “Traballo, igualdade e salarios dignos nunha Galiza con dereitos’ desenvolveuse unha manifestación até a sede da Confederación de Empresarial (CEO) para reclamar un convenio galego para o sector do metal.
Tal e como sinalou o secretario nacional da federación de Industria, Xoán Xosé Bouzas, durante a súa intervención, fronte ao proceso de centralización da negociación colectiva con convenios estatais pactados por cúpulas sindicais sen a participación das persoas traballadoras -como acontece nos convenios de Industria Química, Augas ou Artes Gráficas- “tras a modificación lexislativa que lle dá prioridade aos convenios autonómicos sobre os estatais temos na nosa man blindar a negociación colectiva provincial dotándonos de convenios de ámbito galego”.
Precisamente con este obxectivo a federación de Industria puxo en marcha unha iniciativa o pasado 20 de febreiro con asembleas de delegados/as e mobilizacións diante das patronais das catro provincias para instar a abordar a posibilidade de negociar un convenio galego do metal. Esta demanda estase a trasladar aos centros de traballo, ao tempo que se desenvolven novas protestas, como a que hoxe tivo lugar diante da CEO.
O responsábel sindical tamén se referiu á campaña que a CIG está a levar a cabo para facerlle fronte aos desafíos que achega o desenvolvemento dun sector eólico “que non está a crear nin máis emprego, nin de mellor calidade”. Un sector no que a variedade de empresas (fábricas de ensamblaxe, compañías de deseño e fabricación de equipos, de proxectos, xestoras, subcontratas de mantementos) fai que exista unha gran disparidade en materias como negociación colectiva, convenios, os acordos de empresa, condicións de traballo, etc.
En canto ao naval, incidiu na necesidade dunha “verdadeira estratexia” para recuperar o seu papel fundamental na economía e no que a mellora das condicións laborais e salariais teñen que ser a clave para reter e atraer talento. “Hai que acabar coa subcontratación e a precariedade no sector, as elevadas horas extras e a alta sinistralidade”.
De igual xeito, alertou sobre a situación que atravesa unha industria da automoción na que a Xunta o único que fai é limitarse a financiar con máis fondos públicos a automatización e dixitalización das empresas, “non garantindo carga de traballo nin freando os procesos de deslocalización e de peches”.
Bouzas tamén fixo fincapé en que a loita iniciada contra o espolio enerxético e dos recursos naturais do noso país e a instalación de industrias de enclave (Altri, minaría) “é só unha primeira fase e irá en aumento”. Fronte a isto, apostou por unha transición enerxética e por un proceso de reindustrialización que abra posibilidades de crecemento económico sustentábel para Galiza, con prezos eléctricos máis baixos e unha tarifa propia.
Ademais do secretario nacional da CIG-Industria, na asemblea interviñeron distintos responsábeis sindicais para abordar cuestións como a fenda salarial entre mulleres e homes, a necesidade de dotármonos con convenios galegos, a crise da automoción, o estado da negociación do convenio do siderometal de Ourense ou o impacto da instalación da macrocelulosa Altri na comarca da Ulloa. E tamén se repasaron as problemáticas concretas de empresas como Alcoa, Vestas, Faurecia Ourense e Navantia Ferrol.
Finalmente, chamouse a facer valer a maioría da CIG tanto a nivel galego como no conxunto do sector para avanzar na mellora das condicións laborais e de vida clase traballadora “combatendo a pobreza laboral e a precariedade que trouxeron as reformas laborais e das pensións e sendo firmes na conquista dos nosos dereitos, así como na defensa da nosa identidade como pobo e na necesidade de soberanía”.
