A Concellería de Promoción Económica, Turismo e Formación do Concello de Barbadás culminou o ano 2024 cumprindo amplamente o obxectivo de fomentar a inserción laboral no marco socioeconómico actual. Ao longo do ano, a Área de Formación do CET Barbadás organizou 14 accións formativas que beneficiaron a 222 participantes, combinando teoría e práctica para mellorar as competencias profesionais.
Prioridade aos colectivos máis vulnerables
As actividades formativas enfocáronse principalmente en persoas desempregadas, maiores, mulleres e colectivos en risco de exclusión social. Cunha participación do 53,6% de mulleres, destacouse a súa inserción en sectores tradicionalmente masculinizados. Ademais, apostouse por reducir a fenda dixital na poboación rural mediante programas de aprendizaxe en colaboración coa Fundación Cibervoluntarios.
Accións formativas destacadas
Entre os cursos e talleres realizados ao longo do 2024, destacan:
Taller ExpertClick e Obradoiro de Apps para maiores de 55 anos: Programas dirixidos a mellorar a independencia dixital, ensinando dende a banca online ata o uso de aplicacións móbiles.
Curso de manipulación de alimentos: Tres edicións para cubrir a alta demanda nos sectores de hostalería e alimentación.
Cursos profesionalizantes: Como operador/a de carretilla elevadora e plataforma elevadora, con múltiples edicións pola gran demanda.
Cursos de coidados básicos a persoas dependentes e cursos de cociña creativa, apostando pola formación práctica e innovadora.
Alta demanda e continuidade en 2025
As actividades formativas tiveron unha excelente acollida, con listas de espera en varios cursos. Por este motivo, o concelleiro de Promoción Econónica, José Manuel Morgade, salienta que “o fundamental que perseguimos para este novo ano é continuar dando unha formación que lle sirva a os participantes para a mellora do seu desenrolo profesional ou, de ser o caso que se trate de persoas desempregadas, que poidan atopar un emprego despois de recibir esta formación”. De feito, según os datos que manexa o propio concelleiro, en cursos como os de carretilleiros, “a porcentaxe de ocupación aproxímase ao 100%”. De cara a este ano, a formación impartida polo CET, avanza Morgade, afondará tamén na dixitalizacón e na especialización profesional.
Os resultados o ano pasado confirman que o Centro de Emprego e Tecnoloxía (CET) Barbadás consolidouse como un referente na formación orientada ao emprego, destacando pola súa capacidade de adaptación ás necesidades do mercado laboral e pola inclusión de colectivos vulnerables.
