A deputada do BNG, Sonia Vidal, denunciou hoxe venres 4 de abril, na Comisión 7ª de Agricultura, Alimentación, Gandaría e Montes do Parlamento galego a «vergoñenta» xestión da Xunta na crise sanitaria provocada pola enfermidade hemorráxica epizoótica (EHE), cualificándoa de «fracaso institucional, político e humano».
Durante a comparecencia do director xeral de Gandaría, Agricultura e Industrias Agroalimentarias, Vidal criticou con dureza a falta de transparencia e a resposta «insuficiente e descoordinada» do Goberno galego, especialmente en zonas como Ourense, onde, segundo indicou, «as explotacións estiveron completamente abandonadas pola Administración mentres os casos se multiplicaban».
A nacionalista fixo fincapé nas cifras oficiais que recollen máis de 800 mortes e 5.300 casos positivos en Galicia, alertando de que «se ocultaron datos, negouse a realidade e lanzáronse notas de prensa mentireiras». A súa intervención incluíu exemplos concretos do custe económico real das medidas impostas, destacando que moitas explotacións tiveron que asumir gastos superiores aos 700 euros por tratamento sen recibir compensacións adecuadas.
«¿Como é posible que unha explotación con 25 vacas e 5 casos apenas reciba axudas, mentres outras con menos impacto cobren máis?», preguntou Vidal, criticando a opacidade e inxustiza nos criterios de reparto das axudas.
A parlamentaria tamén denunciou que «mentres o gando morría, a Xunta seguía obrigando á vacinación contra a lingua azul sen criterios sanitarios claros», e censurou o bloqueo do sistema telemático, a negativa a incorporar veterinarios da Deputación e a ausencia de información ás gandeiras afectadas.
Vidal acusou ao Executivo autonómico de priorizar a propaganda por riba das necesidades reais do sector, lembrando que «en pleno pico da crise, a Conselleira de Medio Rural estaba en Verín inaugurando unha base aérea, ignorando as solicitudes urxentes das gandeiras que levaban días sen durmir coas explotacións en colapso».
Durante a súa intervención tamén fixo referencia ao baleiro sanitario decretado en Manzaneda, que foi un entre os moitos que se están levando a cabo e acabando co gando, onde se sacrificaron 49 animais por un único positivo en tuberculose bovina. Vidal cualificou a actuación de «desproporcionada» e pediu a revisión dos protocolos vixentes, reclamando a introdución de probas complementarias e un sistema de defensa para as explotacións.
Finalmente, a deputada nacionalista esixiu «responsabilidade política» e advertiu que «Galiza non pode permitirse un Goberno que lle dea as costas ao rural cando máis o precisa».
